Avval xabar berganimizdek, O‘zbekiston Respublikasi “Hunarmand” uyushmasi raisi Rasuljon Mirzaaxmedov Qoraqalpog‘iston Respublikasida xizmat safarida bo‘lib turibdi.
Safar doirasida uyushma rahbari Taxiyatash tumanidagi mashhur hunarmand Zulfiya Masharipovaning ustaxonasiga tashrif buyurdi.
Ushbu ustaxonada amalga oshirilayotgan ishlar, mahalliy hunarmandchilikni rivojlantirishga qaratilgan sa’y-harakatlar hamda ustalarga yaratilayotgan shart-sharoitlar bilan yaqindan tanishildi.
Suhbat davomida hunarmandchilik mahsulotlarida dizaynni takomillashtirish, zamonaviy talablarga moslashtirish hamda mahsulotlarga munosib bozor topish masalalari muhokama qilindi. Ushbu yo‘nalishda “Hunarmand” uyushmasi tomonidan amalga oshiriladigan qo‘llab-quvvatlash choralari haqida ham fikr almashildi.
“Hunarmand” uyushmasi hunarmandlarni qo‘llab-quvvatlash, ular faoliyatini yanada kengaytirish va milliy merosni saqlashga alohida e’tibor qaratib kelmoqda.
